An i palh kho lai lo

                                                   

“Pathian nih an mang ah Herod sin i kir ti lo ding khan a chimh hna”(Mathai 2:12)

Pathian nih a bia a tanh.A bia a umnak poh ah a mah a um.A umnak poh ah cun teinak a um.Zei ca ah tiah Pathian bia cu a palh kho lo.Cu pin ah a thlahcang mi  a bia cu riantuan lo in a kir bal lo.Pathian nih a fial mi a tlolh hrim hrim lai lo.(Isaih 55:10-11)Cu ca ah Pathian he bia a ruah mi poh Pathian lam hruainak cung ah a kal mi hna cu zei tik hmanh ah an i palh kho hrim hrim lai lo.Pathian bia kha chun zan in a ruat mi cu thluachuah an hmuh lai.An tuah mithil kip ah khua awng a tawng lai.(Salm 1:1-3)

Ni chuah lei arfi thiam singpahrang hna hi a mah Jesuh arfi kha an zulh i Jesuh kan siang pahrang cu an va hmuh i an va biak.A ngai ngai ti ah cun an rat nak lei in kir ding kha an si.A si na in Pathian nih an kir ah cun Jesuh ca ah ral ngan pi a si kha an theih ca ah lam dang ah kal ding in a chimh hna.A chimh bantuk in an zulh.Lam dang in an kal.Har nak chung in an luat.Ni hin ah hin Satan nih a zung zal in a kan bawh har nak pek ding in timh cia in lam a kawl peng.Satan riantuan nak ni hin ah vawlei cung ah khuaruah har in a thang.Ni zan tihni I Paskistan ah Alkaida pawl nih  zei hmanh sualnak a tuah lo mi ngak chia siang inn an kai lio ah 100 leng an thah hna.Is pawl nih mi hnawg pheh cu an i harh lo.Australia  thawngpang hna nih mi a lau ter ngai ngai.An tuk a sum lo.Satan khua chia nih puarthau nak a pek hna.Zei tluk tih nung dah a si.

U le nau chunzan in Pathianhe bia i ruah i a mah lamhruai nak chung ah kan kal um a herh tuk can kan phan.Pathian riantuan nak a thawn chin bantuk in vawlei cung ah satan riantuan nak a thawng chin ve.Kan i ral ring deuh a herh.Biatak Pathian bia kan rel deuh a herh.Thlacam nak in Pathian he bia kan i ruah i a ruah nak a lam hruai nak chung ah kan kal lawng ah kan duh mi kan co khawh lai.Pathian lam hruai nak lam cu a palh kho hrimhrim lai lo.Cu ca ah Pathian aw ngaih in arfi thiam hna bang har nak chung in kan luat peng khawh nak hnga Pathian he bia i ruah peng i zuam hna u sih.

Thlacam

Maw ka pa,Nang mah fim nak cu a palh kho lo ti hi kan hngalh ter law.nang mah fim nak I bochan khawh nak zong na thlarau in kan theih ter hram ko.satan pen nak hi vawlei har chung in kan luat i na pen nak a kauh chin khawh nak hnga kan nun ah bia kan ruah peng ko tiah Jesuh khrih min in zangfah kan nawl.Amen

Rev.Pa Hrang Hmung

You Might Also Like :