Kan Pa Rev.Tluang Hmung tuanbia tawi he pehtlaih in Pu Thanwg Uk (Lilly pa) biahalhnak lehmi ka rak thlah than ve.

Dear Unau hna,

1. Lilly pa: Saya Tluang Hmung cu Hakha nu Pi Par Hem he an i um i, fapa pathum le fanu pahnih an ngeihnak kong kan hmuh? Atu Rev. Pa Hrang Hmung te hna, Pu Ba Za te hna khi tah an min aa tel ve lo i, keimah palh bia a si sual maw? Ka palh ahcun ngaih thiam kan hal cia.

1. VCT: Pi Par Hnem cu 1928 kum ah Pastor Tluang Hmung nih a thit i, a nu le a pa, a rualchan hna  a hoikom khupthi tual vialte cu “ dam te in mu!” tiin a semnak Hakha khuapi cu chuah tak in 1933 February 22 ni ah a chungkhar hna he Lautu ram Fanthen khua ah a rak phan. Pi Par Hnem cu a pasal Tluang Hmung he harnak le mitthli he an rak vorh mi thlaicicu a theipar hmuh manh loin 1941 ah a nunnak cu Pathian sinah aa din. Raw Dia sang an um  lio a si i, a thlan cu Biak inn innhmun ah an ser piak. Pi Par Hnem thlan cungah biak inn an sak. A thih hnu kumkhat chung, Pastor Tluang Hmung cu a fa le (4) he retheih har ngaiin khua an rak sa. Thang Aw lei a far (Ngun Huat nu) zong nih a rak um pi ton hna. Mah lio ahcun a fa a hniangbik Elijah (Daw Par pa) cu kumkhat le cheu hrawng minung a si i, a nu he kup le hnamh kha zeidang nakin a sunsak bik lio caan a si.

Pastor Lunghnemtu ah Pi SungCia a thit.

A nu pi pi Par Hnem a thih hnu kumkhat a rau hnu, 1942 kum ah Pastor Tluang Hmung le a fa le lunghnemtu le innchungkhar kilven tu dingah Pi Sung Cia (BaZa nu) cu a thit. Pi Sung Cia he fapa pa (5) le fanu (2) Pathian thluachuah an hmuh hna i a taang lei hna hi an si:

(1)   Evan Baza  (Leader, L.A.B.C Revival Group)

(2)   U Ka Leb ( Late soldier)

(3)   U Co Kung ( Farmer, Fanthen)

(4)   Boi Uk Thang ( Late)

(5)   Rev. Pa Hrang Hmung (GS: UMCBA (Upper Myanmar Chin Baptist Association)

(6)   Daw Ngun Duai ( Mrs. Lian Mang)

(7)   Daw Hniang Par ( Mrs. Pa Kung) ( Rev. Tluang Hmung a thih hnu ah a chuak mi a si caah Hniangpar an ti.

Cu ticun pi Sung Cia a thit hnuah Pastor Tluang Hmung innchungkhar cu anuammi, aa dawhmi  innchungkhar tling an si than i, an nuva in Pathian rian cu lungtho ngai in an tuan. Lawki mi he buainak zong a dai hlei lo nain Khrifa inndawng an karh chin lengmang.

2. Lilly pa: Lautu ram le Mara tlangah thawngttha ka chim lai a rak ti lio i, Siangbawipa nih Bible cauk le sobul a rak pek tiah"Lautu ram le Mara tlang Pastor hmasa bik" timi tlangtar ah kan hmuh. Siangbawipa nih sobul a rak pekmi hi zei caah dah a si hnga? Zei bantuk sullam dah a ngeih hnga?

2. VCT: Kan Baibal chungah thlarau leiin hmelchunhnak i hmanmi hna; thir, dar, min le hmunhma, a zawng(color) etc.. phunphun le tahchunhnak i hmanmi tuanbia hna tampi an um cu kan theih cio mi a si. Cu hna cu an min le an phun(type) cio hoih in thlarau leiin sullam (spiritual meaning) an ngei cio. Nunnak changreu(John6:36), Nunnak ti, Lam, Biatak (John 14:6), Nunnak le Tukhaltha (John10:11) etc.. hna hi kan bawipa Jesuh hmelhchunhnak an si.

          Cu bantuk in Pathian bia hmelchunhnak thil hna cu Meiin le ceunak (119:105), Mei, Sobul (Jer 23:29), Thlaici (1Peter 1:23) le Thlaalang (Jame: 1:22-25), Rawl (Matt 4:4; ICor 3:1,2) etc.. hna an si ve. Sobul hi tahchunhnak tuanbia siloin Pathian bia hmelchunhnak pakhat a si.

Sobul sullam: 

Sobul (Hammer) ti mi hi Gk holh in ra mi si i, a sullam cu Tuk, Den or fung in tuk ti nak khi si i, thazang le thawnnak a ngeimi tinak asi. Cun a dih tiangin tuah, thil har kha a liim hlan lo a tuah peng ti mi sullam zong a ngei.

Fianhternak: Sobul cu Pathian bia hmelchunhnak pakhat asi bantuk in Siangbawipa Rev. Chester Strait nih kan pa Tluang Hmung Sobul a rak peknak aruang cu:

Rammui ah Pathian thawngtha na auh pi tikah harnak, sifahnak le sersatnak phun zakip na ton ko lai, Sihmanhsehlaw na sinah a rawk kho lomi le a thawngmi Pathian bia (Sobul) hi na hriamnam thabik a si zungzal lai i na rian na liim tiang tuankhawhnak inkhawhnak le teikhawhnak thazang, thawnnak an pek tu zong a si lai ti hmelhchunnak caah a si. Cu kan Pa Tluang Hmung nih a hmanmi Sobul (Pathian bia) nihcun lungbantuk in a haakmi Lawki (Laiphung) mi hna thinlung kha a cheu hna i, Krih ah nunnak thar an hung ngeih ve hna i nihin ah Lautu ram ah ceunak (Rev. Tluang Hmung thlaici a rak thlah mi theipar) kan hmuh nak zong hi a si.

• Jeremiah 23:29 Ka bia cu mei bantuk in kangh hmang a si lo mei? Lungpi a cheutu sobul bantuk a si lo mei?
• Heb 4:12a Pathian bia cu a  nung i a thawng. Kap hnih har vainam nakin a haar deuh.
• Matt 24:35 ah Jesuh nih a chim mi cu Van le Vawlei cu an rawk ko lai; sihmanhsehlaw ka bia cu zeitikhmanh ah a rawk lai lo tiah a ti.

Kan fianh kho hnga dek maw….

Upatnak he,

Van Cin Thang

You Might Also Like :