Ngeichiatnak kan ti mi hi

Bia hmaithi

Ka hngakchia lio in ka pi le ka a u nu nih an ka thi tak. Ka ngei a chiat tuk ve ko nain mitthli luang tiang ka si lo. Hngakchia lio cu a phung a si ko ruah. Midang thih le kan chung lei thih hi ngeichiatnak ai phung dang. Tar, mino le chungkhar hna an thi tikah ka ngeichiatnak ai dangnak kong pathum hi tial ka duh.

Thinak thawngpang 

 Khua ka um lio siseh ramdang ka chuak hnung siseh khua mi pakhatkhat nih an ka thih tak ti thawng ka thei tikah ka ngei achiat ve i zei tluk in dah an chung lei zong an ngei a chiat lai ti ka ruah. Keimah le keimah cu ngeichiatnak a tuar tu tluk in ka ngei chiat pi ve tluk in kai ruah. Capar zong in ngeichiatnak ka rak langh ter pah ton. Minung ka si bantuk in ka tial hman lo mi zong cu um pah ve ko e! Nain cu ngeichiatnak cu caan toi te chung lawng a si. Tlawmpal um ah ka philh dih than. 

Tar thi

Thihnak kan ti mi ah hin tar thih le mino hna an thih hi kan ngeichiatnak ai phun dang ngai. Tar hna cu aw.. an kum atling cang si ko lai. Pathian sin tu thadang tein ai din cang i a mah caah cun atha tuk ko. Minung khrifa mi nih kan nih ruahchan mi cu vanram pei a si ko cu. Kan thi lo ah cun zei tin dah vanram cu kan phan khawh lai kan ti. Sihmansehlaw atang tak mi a chungkhar hna caah kan ruah tikah cun a tuar a har tuk mi a si.  Kum 70 a cung lei hi ka chim duh mi a si.

Mino thi

Mino te nih an kan thi tak cu kan ngei a chiat khun. Mino lio cu duhfah lingcin, thangcho duh lingcin si. Chungkhar, khua le ram hna nih kan nih zohthla lio te an si. An duh mi zong an tuah rih hman hlan ah a kan thih tak mi hi cu a poi tuk kan ti. Khua mi dih lak kan ngei chia dih. Thinak hi hngakchia upa ti um lo in a thih khawh mi lawng te kan si zia kha akan thei ter. 

Chung lei thi

11/04/13 Atuzanleisang suimilam 1600 in rian ka tin i ka email cu hlan bantuk te cu ka on cawlh i ka inbox cu ka vung zoh cun ngeichiatnak thawngpang ti si. Atlang pi ka rel bak ah ka theicia cang bantuk ka si. Aruang cu nai i ka nau Tin Tina dam lo ti kha ka lung ah a hung chuak. Group zong ah thlacam an cah mi kha ka lung ah an hung chuak cawlh. Ka lungchung tein cu si hram hlah seh ti kha ka duh ko.

 Achung ca cu ka vung rel cu Tin Tin Thaw nih an thi tak ti a si taktak ko. Ka zumh khawh lo ka rel palh i si ko lai nai te zarpi nih ah a damnak ding in ka hawi le nih thla an ka cam pi ko cun phaisa ka kuat mi zong a phan rih lai lo  ka ti i ka relnawlh than. Phun Dun fapa Kha Tin Thang nih a kan thi tak ti si ko.  Ka ngeichia tuk ning hi chim khawh a si lo. Keimah te lawng ka um tikah a ho chim awk ka ngei fawn lo. Ka nau taktak asi lo tikah cu tluk cu an ngei a ka chia pi lai ti ka zumh lo caah a hohman ka chim hna lo. Chungkhar a si lo mi hna sinah ngeichianak an va hrawm pi ti cu a um tuk lo.

Ahlan ah ka thilonak thawngpang ka thei i ka ngei a chiapi ka ti mi kha a li mi bantuk ka si. Mah chungkhar thih le mi dang an thi tikah kan ngeichiatnak ai dang zei kha ka thei. Ka khansah tuk. Mah  Aw keimah hman hi tluk in ka ngei a chihat ah cun a hrin tu a nu le a pa chinchap cu zeitluk in dah an ngei a chia rih hngak aw ka ti. Ahlan ah ngeichianak kan hrawmpi mi hna capar ka tial mi baible cang te kha ka ruah than i hna ka ngam ter hna. Minung nunnak cu Pathian kutchung ah a um mi a si. A kan hlanchung mi a si. Pathian nih a caan tling cang si ko lai ka ti than.

Tin Tin Thaw kong

A nu hi ka nu nau a si. A hngakchia lio tein kan inn ah a um ton mi a si i ka chuak tti ka unau ban tuk in ka hmuh mi a si. Ka nua a hngaipa he an nih thit. A hngaakchio lio te ah chim angei ngai mi a si. A zia atha. A nu le pa zong nih an dawtbik mi a si. Kum 18 hrawng lawng a si rih. Tanbo an nih thial hi 10 atling rih lai lo. Unau chuak ti pali lak ah pahnihnak a si.

Azawtnak hi Maisu ah kumli chung kuli rian a tuan i khua lei a rak tlung thiam ti lo caah a chung lei nih an rak don i cu lio ah hin zawtnak hi a ngei pah cang an ti. Si ai thloph khawh lo caah azualchih i Kalay sizung ah an ra pi i si bawi tein nih a nunnak an kham khawh lo i siang lo bu tein a dawttu Pathian sinah a kan din tak hi a si.

Tuar a har khun ko na liam hnung cun!!!

You Might Also Like :