'Khuahnahkai' ti mi sullam ka theih tawk in

'Khuahnahkai' ti mi kong he pehtlaih in U Nehemiah [ ThawngHmung pa ] nih U Thang Lian [ Oe Oe pa ] sin ah biahalnak a ngeih mi kha "Rev. Thang Mang [ Thla Rung pa  ] le Rev. Za Mang [ Oe Oe pa ]  nih an nin leh te hna lai" tiah ka ti i anmah pahnih lehnak an tuah hlanah kahngalh tawk in vun i thlak ve ning law, a ruah zia nan ka thiam cio nak hnga Baw Krih min in kan nawl hmasa kan duh hna.

Vawlei cung um mi miphun dangdang hna nih anmah le an phun cio in 'Kumthar puai' an ngei cio bantukin kan Lautu mi hna zong nih hlan lio te in 'Kumthar' ti mi puai hi an rak ngei ve [ Pu Min Lo nih a ka chim tawn mi  chung in ] ti a si. Cu cu kan Aasaw mi hna zong nih kan pu le pa chan thawk in nihin tiang kan peh zulh ve.

Khuahnah kai ti mi sullam zeidah a si hnga?

1. Khua Lu lei kai tinak : Ka ngakchia thawk in kumtin tlolh lo in ' khuahnahkai' nakah ka rak i tel ve lengmang tawn . Khuahnah kan kai tik tin te ah khuataw lei si lo in khua lu lei tu ah kan kai [ kan hmang ] tawn. Kan kai [ kan hmang ] tikah hin a sangsang in kan ni tthen i ei ding mi vok zong kumtin a chang chang in i thiah a si tawn. Kanmah khuahnah bu ah hin U Ram Hlun [ Khu Thaw pa, tleicia ] hi a kan ho tu bik a si tawn. Amah hi hlan lio phunglam a hngal ve ngai mi pakhat a si ve i, ' Khuahnahkai' ti mi sullam voikhat cu ka hal hen cu! A ka leh mi cu, "Kang Tha a nga vae, Ming Li saming taerae Khuhna taevae suvlaw pachung vazama?" tiah a ka ti i, "Khuhna' ti cu 'khua lu lei' tinak a si i. 'khuahnahkai' ti cu 'khualu lei kai' tinak a si ko cuh' tiah a ka leh. Ka lung a fiang ngai nagi.

2. A san nak hmun tinak : 'Khuahnahkai' ti sullam tak cu asannak hmun ah kai tinak a si kaw, Kumhlun nak in a ra lai mi kumthar ah cun asannak hmun ah kan kai te lai tinak a si cu! Kan tthangcho chin te lai ti zong in ti khawh a si.

3. U le nau, Veng le sang he i hawikawmhnak : Khuahnah kai lai hi kan rak i ngaih ngai mi a si . Khuahnah kai tlolh sual lai ttih ah kan khualtlawnnak hmun zong in a ni can a phak hlanah khuatlun kan ni zuam tawn. Zeicah ti ah cun hi ni ah hin chungkhat unau le veng le sang hmunkhat te ah tthut dir tti i bia songtlor le capo saih in i nuam bik can a si tawn caah a si.

4. Pathian sinah raithawinak can a si: Krifa kan rak si hlan ah cun 'Laiphung' ning te in raithawinak an rak tuah tawn nain Krisfa kan si hnu tu ah cun kanlak i Pathian lei i zumhtlak a si mi nih Pathian bia chimnak le thlacamnak in can an kan hman pi tawn. Kanmah sang ah hin U Uk Tial [ Dar Kung pa, tleicia ] nih can a kan hman piak tawn i thazang kan rak ngah ngai tawn [ Innpa te kan si fawn i a cancan ah hin amah hi ka ngai tuk tawn ] . 'Khuahnah kai' ti mi hi 'Pathian sinah Lawmhnak bia chim ni' kan ti ah cun a sual lem hnga maw ka ti!

Biadonghnak :

Kan khua Aasaw ah 'Khuahnahkai' ti mi hi an peh zulh le zulh lo ka hngal fiang lo. Rangoon um kan Aasaw unau hna nih kumhra luan tiang pehzulh in an tuah khawh peng mi cung ah Pathian sinah kai lawm i anmah cung zong ah kai lawm ve. Hi Khuahnah an kai tawn mi nih hin chiatnak lei si lo in tthatnak lei tu a hruai cho hna lai ti ka zumh. Hmundang le ramdang um Aasaw mi hna ca zong ah zohchunhawktlak an si ka ti!

Hi vial in ' Khuahnahkai' ti mi sullam kan fiang cio cang hnga  kolo maw...

Mi Mi pa, Shillong